Ի՞նչ է նշանադրությունը…

Նշանադրությունն Աստծո տեսանկյունից:

Հին ուխտում եբրայերեն «aras» բառը թարգմանվում է որպես «նշանված», որը նշանակում է՝ «որոշակի պարտականություններ ամուսնության վերաբերյալ»: Այլ խոսքով՝ կապել ինքդ քեզ մեկ ուրիշի հետ ամուսնության խոստմունքով: Իսկ անգլերեն լեզվում «նշանադրություն» բառն ունի բառացիորեն այդպիսի նշանակություն ՝ «engagement», այսինքն՝ «պարտականություն»:

Նշանվածները՝ տղամարդն ու կինը, համարվում են ամուսիններ, սակայն առանց սեռական հարաբերությունների մեջ մտնելու իրավունքի:

Ահա մեկ համար Աստվածաշնչից, ուր նշանվածների մասին խոսվում է որպես ամուսին և կին. «Եթե մեկ կույս աղջիկ մի մարդու նշանված լինի, և մեկ մարդ գտնի նրան քաղաքի մեջ և նրա հետ պառկի, այն ժամանակ երկուսին էլ դուրս հանեք այն քաղաքի դուռը, և նրանց քարերով քարկոծեք, որ մեռնեն. Աղջկան նրա համար՝ որ չաղաղակեց քաղաքում. և մարդուն նրա համար որ իր դրացու կնկան լլկեց. Եվ չարությունը քո միջից վերացնես» (2-րդ Օրին. 23.23-24):

Ինչպես տեսնում ենք` նշանվածները հավասար են համարվում ամուսիններին: Փաստորեն նշանվելիս երկու անձինք ամուսնության պարտականությունով կապում են մեկմեկու:

Որքա՞ն պետք է լինի «սպասման» ընթացքը:

Աստվածաշունչը հստակ ժամկետ չի սահմանում նշանադրության և ամուսնության միջև, բայց լավ կլինի, որ այդ ընթացքը երկար չտևի մի շարք պատճառներով: Այն սպասման ընթացք է, իսկ սպասումը երբեք հաճելի չի լինում, հատկապես՝ սիրահարների համար, ովքեր անհամբերությամբ սպասում են սիրելիի հետ ավելի մոտ հարաբերություններին, որ Աստված է առաջարկում ամուսնության շրջանակներում:

Երբ Աստված զգուշացնում էր Իսրայելին այն անեծքների մասին, որոնք կհասնեն նրանց Տիրոջ օրենքը զանց անելու հետևանքով, Նա ասաց. «Դու կնկան կնշանվես, և ուրիշը կպառկի նրա հետ. տուն կշինես, և նրա մեջ չես բնակվի. այգի կտնկես, նրա խաղողը չես ժողովի» (2-րդ Օրին. 28.30):

Աստված ցանկանում է, որպեսզի ամուսնության մեջ արտացոլվի երկնայինը:

Երբ Աստված Իր ժողովրդին հրահանգներ էր տալիս պատերազմը ճիշտ վարելու վերաբերյալ, Նա նաև պատվիրեց հետևյալը. «Երբ քո թշնամիների դեմ դուրս գաս պատերազմի և տեսնես … մի մարդու, որ կնկա է նշանվել և նրան չի առել, թող ետ դառնա գնա իր տունը. Մի գուցե պատերազմում մեռնի, և մեկ ուրիշ մարդ առնի նրան» (2-րդ Օրին. 21.1,7):

Ինչպես տեսնում ենք՝ Աստված մեզ ցանկանում է երջանկություն և համալրում մեր ընտանիքներում, որպեսզի մենք մեր կյանքով հետք թողնենք աշխարհի երեսին: Ամուսնական հարաբերությունները երկնայինի արտացոլանքն են, ուստի Տերը դրանք առավել բարձր մակարդակում է դնում, քան այլ հարցերը: Ահա, թե ինչ է ասում Նա այս առիթով. «Նոր ամուսնացած մարդը պատերազմի չգնա, և նրան ոչ մի պաշտոն չտրվի, մեկ տարի իր տանը ազատ լինի, և ուրախացնի իր առած կնկան» (2-րդ Օրին. 25.5):

Հետևություն՝ չարժե երկար ձգձգել ամուսնությունը: Աստված անձամբ բավական արտոնյալ պայմաններ է ներկայացնում նշանվածների և նորապսակների համար:

Ինչո՞ւ են սեռական հարաբերություններն արգելված սպասման շրջանում:

 Ինչպես վերը նշեցինք՝ երկրային ամուսնությունը երկնային հարաբերությունների արտացոլումն է, ինչպես գրված է Եփեսացիներին ուղղված թղթում. «Իրար հնազանդ եղեք Աստծո վախով։ Կանայք, հնազանդվեք ձեր մարդկանց ինչպես Տիրոջը։ Մարդը կնոջ գլուխն է՝ ինչպես Քրիստոս էլ եկեղեցու գլուխը, և Ինքն է մարմնի Փրկիչը։ Բայց ինչպես եկեղեցին հնազանդ է լինում Քրիստոսին, այնպես էլ կանայք՝ իրենց մարդկանց ամեն բանի մեջ։ Մարդիկ, սիրեք ձեր կանանց, ինչպես Քրիստոսն էլ սիրեց եկեղեցուն և Իր անձը մատնեց նրա համար» (Եփես. 5.21-25):

Այս երկրի վրա ցանկացած ամուսնության մեջ տղամարդը պետք է արտահայտի Քրիստոսի բնավորությունը, իսկ կինը՝ այն վարքը, որն ակնկալվում է Աստծո և Նրա Եկեղեցու ճշմարիտ սուրբերի կողմից:

Ներկայումս Եկեղեցին, այսինքն՝ այստեղ ապրող հավատացյալները, գտնվում են նշանադրության շրջանում: Հիսուսի հետ ուխտ կնքելու պահից յուրաքանչյուր քրիստոնյա մտնում է երկնային նշանադրության մեջ, իսկ Գառան ամուսնությունը կլինի այն ժամանակ, երբ Նա գա մեզ վերցնելու: Պողոս Առաքյալը զգուշացնում է կորնթացիներին իրենց սպասվող վտանգի մասին. «… Ձեզ համար նախանձավոր եմ Աստծո նախանձով. Որովհետև ձեզ մի մարդու նշանեցի՝ որ մի սուրբ կույս կանգնեցնեմ Քրիստոսի առաջին» (2-րդ Կորնթ. 11.2):

Կույսը կինն է, ով մինչ այդ իր կյանքում որևէ տղամարդու հետ սեռական հարաբերություններ չի ունեցել, նույնիսկ՝ նրա, ում հետ նշանված է: Հակառակ դեպքում՝ նա չի կարող ներկայանալ հարսանեկան արարողությանը որպես մաքուր կույս, այսինքն՝ այն պահից ի վեր, երբ նա սեռական հարաբերությունների մեջ է մտել մինչ ամուսնական ուխտը:

Մաքրությունը հարսանեկան արարողության ընթացքում խորհրդանշվում է հարսնացուի սպիտակ զգեստով: Իսկ իրական երջանկությունն այն է, երբ մենք կարողանանք նույնպիսի մաքրությամբ կանգնել երկնային փեսացուի՝ Քրիստոսի առջև:

Վասիլե Ֆիլատ